Shteti amerikan i Uashingtonit po përballet me një situatë tepër serioze për shkak të zjarreve masive që kanë përfshirë territore të gjera. Sipas autoriteteve, rreth 60 mijë banorë janë evakuuar nga zonat e rrezikuara, me përqendrimin më të madh në Spokane, qyteti i dytë më i populluar i shtetit.
Flakët kanë shkaktuar dëme të konsiderueshme, duke shkatërruar të paktën 600 shtëpi, biznese dhe objekte të tjera. Zjarret kanë përfshirë një sipërfaqe prej rreth 1.000 kilometrash katrorë, ndërsa raportimet e tjera flasin për ndikim në mbi 250.000 hektarë tokë. Përveç shkatërrimit të pronave, zjarret kanë shkaktuar ndërprerje të energjisë elektrike në rajon.
Guvernatori i Uashingtonit, Bob Ferguson, ka shpallur gjendjen e emergjencës në të gjithë shtetin dhe ka urdhëruar ndalimin e djegies. Në një deklaratë publike, Ferguson u shpreh se shteti po përballet me një situatë shumë serioze, duke shtuar se zemrat e autoriteteve janë me banorët që kanë humbur shtëpitë e tyre. Fatmirësisht, deri më tani nuk është raportuar për viktima apo persona të lënduar.
Ekipet e zjarrfikësve po punojnë me intensitet për lokalizimin dhe shuarjen e vatrave, disa prej të cilave mbeten ende jashtë kontrollit. Autoritetet kanë paralajmëruar se moti i thatë mund ta vështirësojë ndërhyrjen e forcave emergjente dhe të rrezikojë përkeqësimin e situatës në ditët në vijim. Hetimet për përcaktimin e shkaqeve të këtyre zjarreve janë duke vazhduar.
Përditësime
Zjarret masive që kanë përfshirë Uashingtonin janë zgjeruar drejt shtetit të Oregonit, ku autoritetet kanë urdhëruar evakuimin e 25,000 banorëve. Flakët kanë përshkuar mbi 800 kilometra katrorë, duke vënë në rrezik 5,000 ndërtesa dhe duke lënë pa energji elektrike 13,000 shtëpi. Në një njoftim në platformën X, guvernatori i Oregonit konfirmoi gjendjen kritike dhe u bëri thirrje qytetarëve t'i përmbahen urdhrave për evakuim.
Kryetarja e bashkisë së Spokane, Lisa Brown, e cilësoi zjarrin si katastrofën më të rëndë natyrore për rajonin. Në të gjithë Uashingtonin, flakët kanë përfshirë 101,171 hektarë, ku 2,180 hektarë janë shkrumbuar vetëm në zonën e Spokane. Guvernatori Bob Ferguson ka kërkuar ndihmën e FEMA-s përmes një komunikimi me Presidentin Donald Trump. Aktualisht, 10,000 klientë në Spokane mbeten pa energji elektrike.
Kriza e zjarreve në shtetin e Utah-ut është përshkallëzuar, duke përfshirë tashmë 145 kilometra katrorë, krahasuar me 41 kilometra katrorë të raportuar më parë. Si pasojë e flakëve, autoritetet kanë konfirmuar ngordhjen e mbi 100 bagëtive. Senatori Maria Cantwell, gjatë një konference në Spokane, nënvizoi rëndimin e situatës në rajonin veriperëndimor, ndërsa në Idaho dhe Oregon, ekipet e emergjencës po punojnë prej 10 ditësh me buldozerë dhe helikopterë për të vënë situatën nën kontroll.
Ekipet e emergjencës kanë lokalizuar tri vatrat kryesore të zjarrit në Spokane: Old Trails, Fairview dhe Meadowview, të cilat kanë përfshirë 21 kilometra katrorë gjatë fundjavës. Në Idahon perëndimore dhe Oregonin lindor, sipërfaqja e djegur ka arritur në gati 1.360 kilometra katrorë kullota. Situata mbetet kritike për zonën bujqësore, ku flakët kërcënojnë mbi 600 shtëpi dhe 800 struktura ndihmëse.