Zjarret e përmasave të mëdha në shtetin amerikan të Washingtonit kanë detyruar rreth 65 mijë banorë të largohen nga banesat e tyre, ndërsa situata vijon të mbetet kritike. Sipas të dhënave zyrtare, flakët kanë shkatërruar më shumë se 700 ndërtesa, kryesisht në zonën e qarkut Spokane. Guvernatori i shtetit, Bob Ferguson, ka shpallur gjendje të jashtëzakonshme dhe ka kërkuar ndihmë federale pas bisedimeve me presidentin e SHBA-së, Donald Trump.
Kryetarja e bashkisë së Spokane, Lisa Brown, e ka përshkruar situatën si një nga fatkeqësitë më të rënda natyrore për rajonin. Ndërkohë, sherifi i qarkut Spokane, John Nowels, konfirmoi se është arrestuar një 37-vjeçar nën akuzën për zjarrvënie të shkallës së parë, i cili dyshohet se është i lidhur me zjarrin e njohur si "Old Trails". Përpjekjet për menaxhimin e situatës po mbështeten nga më shumë se 1 mijë zjarrfikës.
Sipas Departamentit të Burimeve Natyrore, në shtet janë aktive 16 vatra të mëdha zjarri. Situata rëndohet nga kushtet meteorologjike, duke përfshirë erërat e forta dhe thatësirën, të cilat kanë ndihmuar në përhapjen e shpejtë të flakëve. Zjarri në Sinlahekin ka përfshirë 34.398 hektarë, ndërsa zjarri "Giant" afër Leavenworth ka djegur 20.759 hektarë. Ekspertët vlerësojnë se ndryshimet klimatike po ndikojnë në zgjatjen dhe ashpërsimin e sezonit të zjarreve në perëndim të Shteteve të Bashkuara. Deri në këto momente, autoritetet nuk kanë raportuar për viktima apo të lënduar.