Zjarret që kanë përfshirë pjesën jugore të Spanjës prej ditës së enjte kanë shkaktuar një bilanc të rëndë prej 12 viktimash. Flakët kanë shkrumbuar rreth 66 mijë hektarë tokë, ndërsa qindra zjarrfikës dhe efektivë ushtarakë, të mbështetur nga mjete ajrore, vijojnë operacionet në terren. Rreth 1,500 banorë janë evakuuar deri më tani nga zonat e rrezikuara.
Kreu rajonal i shërbimeve të shpëtimit, Antonio Sant, deklaroi se gjatë natës kushtet atmosferike kanë favorizuar ndërhyrjen e ekipeve. Sipas tij, kjo është dita e parë që ekipet e emergjencës mund të kalojnë nga një qasje mbrojtëse në ndërhyrje agresive për shuarjen e zjarreve. Gjithashtu, ai theksoi se Xhandarmëria ka kontrolluar zonat e prekura dhe deri më tani nuk ka raportime për viktima të reja.
Në lidhje me personat e zhdukur, ministri i Brendshëm, Fernando Grande-Marlaska, kërkoi kujdes, duke saktësuar se shifra e raportuar prej 23 personash nuk është e saktë. Ai sqaroi se deri më tani janë regjistruar 7 kallëzime zyrtare për persona të zhdukur, ndërsa disa prej tyre mund të jenë thjesht qytetarë me të cilët familjarët nuk kanë mundur të vendosin kontakt për shkak të ndodhjes së tyre në qendrat e pritjes. Autoritetet janë në pritje të përfundimit të autopsive dhe procesit të identifikimit për të përcaktuar bilancin përfundimtar të tragjedisë.