Situata nga zjarret pyjore në Spanjë dhe Francë mbetet tepër kritike, me autoritetet që raportojnë shifra të larta të evakuimeve dhe dëmeve mjedisore. Sipas të dhënave më të fundit, mbi 300 mijë persona janë evakuuar deri më tani nga të dyja vendet.
Në Spanjë, Ministria e Brendshme bëri të ditur se të paktën 63,152 persona janë evakuuar nga rajonet qendrore të Madridit, Toledos dhe Avilës, ndërsa 15 mijë të tjerë janë larguar nga zonat në Valencia. Për shkak të përhapjes së shpejtë të flakëve, qeveria spanjolle ka shpallur gjendjen e jashtëzakonshme dhe ka pezulluar përkohësisht përdorimin e makinerive bujqësore për korrje. Ministrja për Tranzicionin Ekologjik, Sara Aagesen, konfirmoi se zjarri në provincën e Avilës ka djegur mbi 50 mijë hektarë tokë, duke u klasifikuar si zjarri më i madh në historinë e vendit. Vetëm në këtë provincë, mbi 25 mijë banorë janë evakuuar, ndërsa mbi 8,700 persona të tjerë janë udhëzuar të qëndrojnë të izoluar në banesat e tyre për shkaqe sigurie. Që nga fillimi i vitit, zjarret në territorin spanjoll kanë shkatërruar rreth 150 mijë hektarë tokë dhe kanë shkaktuar 13 viktima.
Në Francë, situata është përkeqësuar në rajonin e Zhirondës, me flakët që po i afrohen qytetit të Bordeaux. Sipas vlerësimeve, zjarret kanë përfshirë 42 mijë hektarë pyje, duke detyruar evakuimin e rreth 220 mijë personave nga zona e prekur. Flakët raportohet se ndodhen rreth 15 kilometra larg qendrave të banuara. Autoritetet franceze kanë shprehur shqetësimin se vala e ardhshme e të nxehtit mund ta vështirësojë edhe më tej punën e ekipeve të ndërhyrjes.
Përditësime
Autoritetet spanjolle urdhëruan evakuimin e qindra banorëve në komunitetin e Gatovës, Valencia, pas shpërthimit të një zjarri të ri si pasojë e rrufesë. Të dhënat nga Sistemi Evropian i Informacionit për Zjarret në Pyje (EFFIS) konfirmojnë se sipërfaqja e djegur në Spanjë ka arritur në mbi 2.97 milionë hektarë gjatë këtij viti. Kjo shifër tejkalon ndjeshëm vlerësimet e mëparshme, duke reflektuar përkeqësimin drastik të situatës në territorin spanjoll.