Alban Zogaj, kandidat i Lidhjes Demokratike të Kosovës (LDK) për deputet në këtë legjislaturë të Kuvendit, por që nuk u bë pjesë e saj, ka reaguar lidhur me zhvillimet e fundit brenda partisë.
Ai postoi në rrjetin social Facebook, duke deklaruar se LDK nuk është parti e rrjeteve sociale, por e institucioneve të saj. Zogaj vlerësoi se kryetari Lumir Abdixhiku e ka ofruar dorëheqjen në mënyrën më korrekte dhe demokratike, përmes Kuvendit të LDK-së, duke respektuar procedurat dhe organet vendimmarrëse.
“Kjo është sjellje institucionale dhe e përgjegjshme”, tha Zogaj. Ai paralajmëroi se çdo përpjekje për ta imponuar largimin e kryetarit përmes presionit publik, fyerjeve apo fushatave të orkestruara është e rrezikshme për LDK-në dhe për demokracinë e saj të brendshme.
Sipas tij, LDK-së i nevojitet reflektim, analizë dhe unitet, jo linçim dhe përçarje. Vendimet, sipas Zogajt, merren në Kuvendin e LDK-së, siç i takon një partie serioze dhe institucionale.
Deklarata e plotë e Alban Zogajt:
• LDK nuk është parti e rrjeteve sociale, por e institucioneve të saj.
• Lumir Abdixhiku e ka ofruar dorëheqjen në mënyrën më korrekte dhe më demokratike, në Kuvendin e LDK-së, aty ku merren vendimet.
• Kjo është sjellje institucionale dhe e përgjegjshme.
• Çdo përpjekje për ta imponuar largimin e kryetarit përmes presionit publik, fyerjeve apo fushatave të orkestruara është e rrezikshme për LDK-në dhe për demokracinë e saj të brendshme.
• LDK ka nevojë për reflektim, analizë dhe unitet, jo për linçim dhe përçarje.
• Vendimet i merr Kuvendi i LDK-së. Ashtu siç duhet në një parti serioze.