Zyra e Rregullatorit për Energji (ZRRE) ka dalë me një sqarim publik më 20 janar 2026 lidhur me trajtimin e borxhit të keq në procesin tarifor. Ajo ka refuzuar kërkesën e KESCO-s për rritjen e këtij niveli në rreth 5%, duke e cilësuar atë të papranueshme.
ZRRE shpjegon se borxhi i keq është i rregulluar qartë në Rregullën për Vendosjen e të Hyrave të Furnizuesit me Shërbim Universal dhe zbatohet prej vitesh në të gjitha proceset tarifore. Ky element siguron që tarifat të reflektojnë kosto reale dhe të verifikuara, si dhe të mbrojnë konsumatorët që paguajnë rregullisht.
Borxhi i keq përfshin vetëm atë pjesë të detyrimit financiar që mbetet e paarkëtueshme pas ndjekjes së të gjitha procedurave ligjore dhe shterimit të mekanizmave të arkëtimit.
ZRRE nuk pranon automatikisht kërkesat e operatorëve, pasi rregullimi tarifor bazohet në fakte të verifikuara dhe analiza profesionale. Në bazë të projeksioneve të fundit, të dhënat tregojnë përmirësim të arkëtimit pas pandemisë. Duke u mbështetur në studime paraprake, ZRRE ka përcaktuar nivelet e borxhit të keq si vijon:
• 1.8% për vitin 2025;
• 1.6% për vitin 2026;
• 1.4% për vitin 2027.
ZRRE siguron qytetarët se asnjë vendim tarifor nuk merret për të mbrojtur mospagesën, por për të garantuar stabilitetin e furnizimit. Të gjitha proceset rregullatore janë publike dhe transparente. Çdo vlerësim bazohet në raporte profesionale të publikuara për konsultim publik, ndërsa vendimmarrja përfundimtare nga Bordi i ZRRE-së ndodh pas shqyrtimit të komenteve nga të gjitha palët e interesuara.