Zyrtarë amerikanë i thanë Radio Evropa e Lirë më 6 mars se Rusia po i ofron Iranit informacione për shënjestrim për të sulmuar trupat dhe asetet ushtarake amerikane në Lindjen e Mesme. Kjo konfirmon raportin e gazetës Washington Post, që sugjeron rolin e rëndësishëm, megjithëse të tërthortë, të Moskës në konfliktin rajonal në zgjerim.
Raporti i Washington Post citon tre zyrtarë të njohur me inteligjencën, sipas të cilëve Moska i ka ofruar Teheranit vendndodhjet e aseteve ushtarake amerikane — përfshirë anije luftarake dhe avionë — që nga fillimi i konfliktit më 28 shkurt, me sulmet ajrore të SHBA-së dhe Izraelit kundër Iranit. Njëri prej tyre e përshkroi si “një përpjekje mjaft gjithëpërfshirëse” nga ana ruse. Zyrtarët amerikanë, në kushte anonimiteti, nuk dhanë detaje të mëtejshme për REL-in mbi shtrirjen ose mekanizmat e ndarjes së këtyre të dhënave.
Bashkëpunimi i pretenduar vjen në një moment shumë delikat për marrëdhëniet SHBA-Rusi, me rivalët e armatosur me armë bërthamore në tension për shkak të pushtimit rus të Ukrainës dhe përpjekjeve amerikane për të ndaluar luftën, të cilat Kremilini i ka refuzuar deri tani për lëshime territoriale dhe të tjera.
Rusia dhe Irani kanë lidhje të kahershme ushtarake, politike e diplomatike. Irani i ka furnizuar Rusinë me një numër të madh dronësh Shahed për goditje ndaj qyteteve dhe infrastrukturës në Ukrainë, ndonëse Rusia tani, në pjesën më të madhe, përdor teknologjinë për të prodhuar dronë në territorin e vet.
Ambasada ruse në Uashington nuk iu përgjigj kërkesave për koment. Zyrtarët rusë kanë kërkuar publikisht ndërprerjen e luftës, duke e quajtur atë “akt të paprovokuar të agresionit të armatosur” kundër Iranit. Më 6 mars, presidenti rus Vladimir Putin zhvilloi bisedë telefonike me presidentin iranian Masud Pezeshkian dhe përsëriti thirrjen për “fund të menjëhershëm të veprimeve ushtarake”.