Një 21-vjeçar shqiptar është dënuar me 3 vite e 8 muaj burg në Itali për grabitje dhe dhunë ndaj një 14-vjeçari. Vendimi u mor në procedurë të përshpejtuar nga gjykata.
Ngjarjet ndodhën mes shtatorit 2024 dhe prillit 2025 në qytetin Borgo San Lorenzo. Sipas hetimeve, i dënuari bashkë me disa bashkëmoshatarë ushtronin presion çdo javë ndaj të miturit. Ata e ndalonin në rrugë dhe nën kërcënimin e dhunës e detyronin të jepte paratë që kishte me vete.
Shumat e marra varionin nga disa monedha deri në 15 euro për herë, ndërsa në total dyshohet se grupi ka marrë rreth 200 euro. Kërcënimet përfshinin fraza si "Nëse nuk më jep paratë, do të të rrah" ose "do të vij të të gjej në shtëpi".
Të mituri, i frikësuar, nuk u kishte treguar prindërve për presionin. Ai foli më 26 prill 2025, pas marrjes me forcë të portofolit nga 21-vjeçari. Pas kësaj, babai i viktimës ndërhyri për ta mbrojtur, por u sulmua nga grupi me shkopinj.
Hetuesit identifikuan autorët falë dëshmive të viktimës dhe identifikimeve me fotografi. Përveç 21-vjeçarit, në hetim janë përfshirë edhe tre nxënës të tjerë, të cilët në kohën e ngjarjes ishin 16 dhe 17 vjeç. I dënuari ndodhet në arrest shtëpie që prej kohësh.