28-vjetori i rënies së komandantit të UÇK-së Abedin Rexha

Abedin Rexha, i njohur ndër bashkëluftëtarët e tij edhe me nofkën “Sandokani”, ishte një ndër luftëtarët e parë të Ushtrisë Çlirimtare të Kosovës (UÇK). I lindur më 8 korrik 1969 në fshatin Vajnik, ai u angazhua për lirinë e vendit që në vitet '90. Pas shkollimit fillor në Turiçec dhe atij në Skenderaj, Rexha ndoqi studimet në Fakultetin Xehetar-Metalurgjik në Mitrovicë. Gjatë kësaj periudhe, ai bashkëpunoi me figura të njohura të ilegales, si Jakup Nura dhe Nuhi Geci, duke shpërndarë trakte kundër pushtimit serb. Në vitin 1992, për shkak të ndjekjes nga forcat serbe, ai u detyrua të largohej në mërgim, për t'u rikthyer në Kosovë në vjeshtën e vitit 1996 me detyra të caktuara.

Angazhimi i tij operacional u intensifikua në vitin 1997. Sipas gjeneralit Lahi Brahimaj, në korrik të atij viti, Abedin Rexha hyri në Kosovë me një grup ku bënin pjesë edhe Hashim Thaçi dhe Kadri Veseli. Më 6 maj 1997, Rexha mori pjesë në një përpjekje për të kaluar kufirin me një grup luftëtarësh, ku pas një përleshjeje mbeti i vrarë Luan Haradinaj. Së bashku me bashkëluftëtarë si Adrian Krasniqi, Ilaz Kodra dhe Ilir Konushevci, ai punoi në zgjerimin e radhëve të UÇK-së. Më 25 nëntor 1997, ai u përball me policinë serbe në fshatin Vajnik, përleshje gjatë së cilës u vranë dy policë serbë dhe mbeti i plagosur 11-vjeçari Baki Krasniqi. Një ditë më pas, ai mori pjesë në pritën e organizuar nga Adem Jashari në Klisyrë, ngjarje që shërbyen si pikë kthese për daljen publike të UÇK-së.

Në fillim të gushtit 1998, Shtabi i Përgjithshëm i UÇK-së e emëroi atë komandant të Brigadës 112 “Arben Haliti” në Zonën Operative të Drenicës. Abedin Rexha ra heroikisht në fushën e betejës më 8 tetor 1998, gjatë ofensivave të forcave serbe në pyjet e fshatit Kllodernicë. Ai la pas bashkëshorten dhe dy fëmijë, Sokolin dhe Selveten. Kujtimi i tij nderohet sot përmes këngëve, poezive dhe emërtimit të shkollës fillore në Turiçec, ku ai mori mësimet e para.