Strukturat e Policisë së Vlorës kanë proceduar penalisht shtetasin A. A., 33 vjeç, banues në Vlorë, për hedhje mbetjesh inerte në trotuar. Ngjarja u evidentua gjatë monitorimit të territorit për garantimin e rendit, sigurisë dhe parandalimin e paligjshmërive.
Sipas policisë, A. A. kishte kryer punime rikonstruktimi në banesën e tij dhe më pas kishte hedhur inertet në hapësirën publike. Kjo veprimtari ndoti mjedisin, pengoi lëvizjen e lirë të këmbësorëve dhe rrezikoi sigurinë dhe qarkullimin e qytetarëve.
Materialet procedurale iu referuan Prokurorisë pranë Gjykatës së Juridiksionit të Përgjithshëm Vlorë për veprën penale "Menaxhimi i mbetjeve", të parashikuar nga neni 201/a i Kodit Penal.
Paralelisht, Policia Bashkiake Vlorë i vendosi A. A.. një gjobë administrative prej 20.000 lekësh, në zbatim të legjislacionit për mbrojtjen e mjedisit urban.
Policia e Vlorës apelon te qytetarët që të mbrojnë mjedisin dhe të denoncojnë në numrin 112 çdo paligjshmëri të tillë.