Sipas të dhënave të Eurostat për strukturën e popullsisë së huaj sipas vendit të lindjes, më 1 janar 2024, 557 mijë persona të lindur në Shqipëri jetonin në Itali. Ky numër përbën 8.3% të totalit të emigrantëve në Itali, duke e bërë komunitetin shqiptar të dytin më të madh pas rumunëve me 900 mijë persona ose 13.5% të totalit.
Ndërsa 416 mijë prej tyre rezultojnë si shtetas shqiptarë, diferenca prej 141 mijë personash lidhet me fitimin e shtetësisë italiane nga një pjesë e emigrantëve. Kjo prani e konsoliduar reflektohet në tregun italian të punës dhe në strukturën sociale të vendit.
Duke pasur parasysh popullsinë aktuale, Shqipëria me 2.36 milionë banorë ka një emigracion shumë më të lartë në raport me Rumaninë me 19 milionë banorë. Në nivel europian, Shqipëria renditet e para për numrin e emigrantëve në raport me popullsinë, me vlerësimin se afërsisht një në dy shqiptarë jeton në Bashkimin Europian.
Eurostat nuk raporton të dhëna për Greqinë, ku emigrantët shqiptarë vlerësohen në nivele të ngjashme ose më të larta se në Itali. Në Slloveni, për shembull, 30 mijë shtetas të lindur në Kosovë përbëjnë 9.3% të emigrantëve.
Në të gjithë BE-në, 44.7 milionë persona të lindur jashtë Bashkimit Europian jetonin në vendet anëtare, duke përfaqësuar 9.9% të popullsisë së BE-së, me një rritje prej 2.3 milionë personash krahasuar me vitin paraardhës. Gjithashtu, 17.9 milionë persona kishin lindur në një vend tjetër të BE-së.