Organizata Ndërkombëtare për Migracionin (IOM) në raportin World Migration Report 2026, të publikuar më 6 maj 2026, vlerëson se Shqipëria është ndër vendet europiane ku emigracioni i personave në moshë riprodhuese mund të çojë në rënie të mëtejshme të popullsisë.
Europa ka numrin më të madh të vendeve me rënie të ndjeshme të popullsisë gjatë 2005-2024. Në disa vende, kjo lidhet kryesisht me normat e ulëta të lindshmërisë, ndërsa emigracioni ka kontribuar gjithashtu.
Shqipëria përmendet krahas Lituanisë, Moldavisë dhe Bosnjë-Hercegovinës, si vende ku normat e fertilitetit janë nën nivelin e zëvendësimit. "Në vende si Shqipëria, Lituania, Republika e Moldavisë dhe Bosnja e Hercegovina, emigracioni i personave në moshë riprodhuese mund të kontribuojë në një rënie të mëtejshme të popullsisë, për shkak të numrit të lindjeve që humbasin pas largimit jashtë vendit", thuhet në raport.
Gjatë tre dekadave të ardhshme, vende si Moldavia, Bosnjë-Hercegovina dhe Lituania pritet të humbasin 20% ose më shumë të popullsisë. Për shumë vende europiane, imigracioni do të mbetet faktor kyç për rritjen e popullsisë, duke zbutur efektet e plakjes dhe lindshmërisë së ulët.
Në 2024, numri i migrantëve ndërkombëtarë në botë ishte rreth 304 milionë, ose 3.7% e popullsisë globale. IOM thekson se shumica e njerëzve vijojnë të jetojnë në vendin ku kanë lindur.
Të dhëna të Eurostat tregojnë se në 2024, rreth 48.2 mijë shtetas shqiptarë morën shtetësi në një vend të BE-së.
Përditësime
IOM raporton se 62% e emigrantëve shqiptarë janë nën 35 vjeç