Eurostat ka publikuar të dhënat e imigracionit në Bashkimin Europian, sipas të cilave rreth 44 mijë shqiptarë emigruan në vendet e BE-së në vitin 2024. Këto statistika nuk përfshijnë Greqinë, destinacion kryesor për emigrantët shqiptarë.
Tendenca ka shënuar rënie krahasuar me periudhën 2022-2023, kur ritmet arritën në rreth 50 mijë persona për vit, nivelet më të larta të emigracionit të dekadës së fundit. Megjithatë, këto ritme mbeten më të larta se para pandemisë, përjashtim duke qenë viti 2015, me rekord kërkesash për azil dhe fillim të një cikli të ri emigracioni.
Që nga viti 2010, në vendet e BE-së janë regjistruar 460 mijë emigrantë të rinj nga Shqipëria. Kjo reflekton një cikël të ri masiv emigracioni, në raport me popullsinë e vendit, e cila ka zbritur në 2,36 milionë banorë nga 2,8 milionë në Censin e vitit 2011.
Vetëm pas pandemisë, në periudhën 2021-2024, nga Shqipëria kanë ikur të paktën 180 mijë persona, pa llogaritur të dhënat për Greqinë dhe Mbretërinë e Bashkuar, ku ikjet kulmuan në 2022.
Në vitin 2024, destinacioni kryesor ishte Italia, me gati 28 mijë emigrantë, krahasuar me 29-30 mijë në dy vitet e mëparshme. Në vend të dytë renditet Gjermania, me rreth 12 mijë emigrantë, kryesisht profesionistë si mjekë, infermierë dhe specialistë të teknologjisë së informacionit.
Në kontekstin e BE-së, në 2024 mbërritën rreth 4,2 milionë emigrantë nga vende jashtë BE-së dhe 1,5 milionë persona u zhvendosën brenda BE-së. Këto shifra nuk përfshijnë refugjatët ukrainas nën mbrojtje të përkohshme.