Sipas të dhënave të Eurostat, shtetasit shqiptarë paraqitën vetëm 5065 kërkesa për azil në vendet e Bashkimit Europian në vitin 2025. Kjo shifër shënon një rënie prej 30% krahasuar me vitin e mëparshëm dhe është gati tre herë më e ulët se kulmi i regjistruar në 2022. Edhe në raport me pandeminë, kur lëvizjet ishin të kufizuara, numri i kërkesave mbetet më i vogël. Franca mbetet destinacioni kryesor për azil, për shkak të politikave sociale, e ndjekur nga Gjermania.
Rënia e kërkesave për azil tregon zhvendosje drejt formave të tjera emigracioni. Lejet e punës për shqiptarët u rritën ndjeshëm dhe u dhëna mesatarisht 20 mijë në vit për periudhën 2022-2024, krahasuar me 3-4 mijë një dekadë më parë. Kështu, ikjet me leje pune janë katër herë më të larta se kërkesat për azil. Vendet kryesore janë Italia, Greqia dhe Gjermania. Arsyet e tjera përfshijnë bashkimin familjar.
Statistikat e emigracionit në BE tregojnë se, në periudhën 2021-2024, të paktën 180 mijë shqiptarë u larguan nga vendi, me mesatare 40-50 mijë persona në vit. Këto të dhëna nuk përfshijnë Greqinë e Mbretërinë e Bashkuar, ku kjo e fundit regjistroi një valë kulmore në 2022.
Grupi më i madh emigrantësh është mosha 25-29 vjeç, me mbi 6 mijë persona ose 14.3% të totalit. Pas tyre renditen 30-34 vjeç me 13%, ndërsa largimi i familjeve të reja është i dukshëm, me grupmoshat nën 15 vjeç që përbëjnë gati 18% të emigrantëve.