Sipas të dhënave zyrtare të Institutit të Statistikave (INSTAT), gjatë vitit 2025, Shqipëria shënoi rritje të kërkesave për mbrojtje ndërkombëtare. Numri i azilkërkuesve arriti në 144, duke shënuar një shtim prej 40 rastesh krahasuar me vitin 2024.
Origjina e azilkërkuesve dhe fluksi
Përbërja e aplikantëve për azil dominohet nga:
• Egjipti: 39,6% të kërkesave
• Afganistani: 11,8% të kërkesave
• Palestina: 9,7% të kërkesave
Nga analiza e flukseve, mbi 63,2% e kërkesave për azil u regjistruan përgjatë muajve gusht, shtator dhe tetor, duke treguar një përqendrim sezonal të këtyre lëvizjeve.
Shtetësia shqiptare
Në të njëjtën periudhë, procesi i marrjes së shtetësisë shqiptare regjistroi 495 përfitues, prej të cilëve 306 e kanë rifituar dhe 189 e kanë fituar për herë të parë. Struktura e përfituesve mbizotërohet nga:
• Kosova: 56,1%
• Turqia: 20,1%
• Maqedonia e Veriut dhe Italia: nga 4,8% secila
Analiza demografike tregon se grup-mosha 30-39 vjeç është më e përfaqësuara, duke përbërë 31,7% të personave që fituan shtetësinë dhe 43,9% të atyre që vendosën të heqin dorë nga ajo. Gjithsej, 173 persona hoqën dorë nga shtetësia shqiptare gjatë vitit 2025.
Përditësime
Të dhënat e INSTAT për vitin 2025 tregojnë një rënie të ndjeshme të interesit për shtetësinë shqiptare. Sipas raportit, numri i personave që e kanë përfituar atë ka rënë me 46% krahasuar me 919 rastet e regjistruara gjatë vitit 2024. Analiza tregon një tkurrje të kërkesave si për marrjen, ashtu edhe për heqjen dorë nga shtetësia, çka pasqyron një ndryshim të qasjes së aplikantëve ndaj procedurave administrative.