Aplikimet për azil nga shtetasit shqiptarë drejt vendeve të Bashkimit Europian kanë shënuar një rënie të ndjeshme në tremujorin e parë të vitit 2026. Statistikat zyrtare regjistrojnë 1,045 kërkesa, shifra më e ulët e raportuar që nga viti 2013. Një rënie e tillë është e dukshme sidomos në Francë, e cila ka përpunuar vetëm 310 kërkesa në tre muajt e parë të këtij viti, krahasuar me rreth 1,500 aplikime të përpunuara në të njëjtën periudhë të vitit 2022.
Ekspertët theksojnë se kjo tendencë nuk pasqyron një pakësim të emigracionit, por një ndryshim të formave të largimit. Përderisa aplikimet për azil kanë rënë në rreth 5 mijë për gjithë vitin 2025, lejet e punës janë bërë rruga kryesore për të lënë vendin. Gjatë periudhës 2022-2024, janë dhënë mesatarisht 20 mijë leje pune në vit, kryesisht për shtete si Italia, Greqia dhe Gjermania, nga rreth 3-4 mijë që jepeshin një dekadë më parë.
Ky fluks largimesh, i mbështetur edhe nga bashkimi familjar, vazhdon të ndikojë në treguesit demografikë të vendit. Të dhënat e INSTAT konfirmojnë se emigracioni neto mbetet konstant, me 28-30 mijë persona që largohen mesatarisht çdo vit. Në harkun kohor prej pesë vitesh, nga 1 janari 2021 deri më 1 janar 2026, më shumë se 166.4 mijë shqiptarë janë larguar nga vendi, çka thellon më tej sfidat e plakjes së popullsisë.