Lumir Abdixhiku, kryetar i Lidhjes Demokratike të Kosovës (LDK), u kërkoi politikanëve dhe qytetarëve të mos thonë se po dënohet Ushtria Çlirimtare e Kosovës (UÇK) pas vendimit dënues ndaj ish-krerëve të saj në Hagë. Ai i bëri deklaratat në emisionin “Rubikon” të Klan Kosovës, më 22 tetor.
Abdixhiku tha se nuk dëshiron të paragjykojë procesin, i cili është në fazën e apelit, por theksoi se politikanët nuk duhet të përdorin gjuhën se po dënohet UÇK-ja. Sipas tij, këtë qëndrim ua ka kërkuar edhe liderëve të tjerë politikë.
“Ju lutem, mos e thoni, mos e thoni që dënohet UÇK-ja, sepse s’dënohet UÇK-ja. Ju lutem, kjo nuk bën të thuhet kështu… edhe kështu ua kam kërkuar të gjithë liderëve politikë… edhe kështu e kërkoj vazhdimisht dhe dua të argumentojmë, dhe jam në gjendje të argumentoj me secilin njeri kundërshtar të Republikës së Kosovës që UÇK-ja nuk është kriminale”, tha Abdixhiku në “Rubikon”.
Ai shtoi se nuk mund ta paragjykojë procesin, pasi ai është ende në zhvillim, dhe përsëriti se nuk duhet përdorur kjo gjuhë në diskutimet publike.
“Edhe po të ishte ashtu, e që s’është, edhe po të ishte ashtu ne do të duhej të bënim gjithçka që mos mos ta merrnim përsipër këtë autorësi. Kjo gjuhë nuk është e jona”, tha Abdixhiku, duke kundërshtuar që një veprim i tillë t’i atribuohet UÇK-së.