Më 9 korrik 2026, Aeroporti Ndërkombëtar i Tiranës mirëpriti fluturimin inaugurues të kompanisë Chair Airlines, duke zyrtarizuar nisjen e operimeve të saj në Shqipëri. Kompania zvicerane, e cila ofron shërbime turistike me avionë Airbus A319 dhe A320, e ka përfshirë Tiranën në rrjetin e saj të zgjerimit në rajonin e Ballkanit.
Piervittorio Farabbi, Drejtor Operacional i TIA, deklaroi se hapja e kësaj linje i përgjigjet kërkesës në rritje për udhëtime mes dy vendeve, duke e cilësuar këtë si një hap të rëndësishëm në zgjerimin e lidhjeve ajrore të Shqipërisë me Europën. Nga ana e tij, Shpend Ibrahimi, Drejtor Ekzekutiv i Chair Airlines, theksoi se Shqipëria është një treg gjithnjë e më i rëndësishëm për strategjinë e kompanisë.
Fluturimet e reja pritet të lehtësojnë lëvizjen e pasagjerëve, duke ofruar më shumë fleksibilitet për udhëtarët që kërkojnë lidhje direkte mes Zvicrës dhe Shqipërisë.