Dy agjenci lajmesh të lidhura me Korpusin e Gardës Revolucionare Islamike (IRGC) kanë publikuar propozime që i bëjnë thirrje Teheranit të vendosë tarifa ndaj firmave globale të teknologjisë për kabllot nënujore me fibra optike në Ngushticën e Hormuzit. Kjo ngushticë ujore lidh Gjirin Persik me detin e hapur dhe është rrugë kyçe detare pranë brigjeve iraniane.
Irani ka insistuar për javë të tëra se ka të drejtë të vendosë tarifa ndaj anijeve ndërkombëtare që kalojnë transit nëpër këtë ngushticë. Rihapja e saj, e mbyllur në mënyrë efektive nga Teherani që kur Shtetet e Bashkuara dhe Izraeli nisën fushatën ajrore më 28 shkurt, mbetet pengesë kryesore për përfundimin e luftës. Teherani pretendon sovranitet mbi këtë rrugë strategjike, pretendim që kundërshtohet nga komuniteti ndërkombëtar.
Ndikimi në kabllot nënujore
Kabllot nënujore kryesisht janë në pronësi dhe operohen nga kompani si Google, Meta, Microsoft dhe Amazon. Ato bartin transaksione SWIFT, trafik interneti dhe të dhëna të përgjithshme mes Azisë, Evropës dhe Gjirit Persik.
Nëse këto kabllo këputeshin, ndikimi do të ishte i menjëhershëm dhe i madh për njerëzit e zakonshëm në Azinë, Lindjen e Mesme dhe Evropën. Shërbimet e transmetimit online do të ndërpriteshin ose dështonin plotësisht, aplikacionet e mesazheve do të ngadalësoheshin ose dilnin jashtë funksionit, ndërsa thirrjet me video do të ndërpriteshin.
Vlerësimi i ekspertëve
Ekspertët vlerësojnë se propozimet për pagesa ndaj kabllove nën ngushticë janë më shumë kërcënim sesa plan i zbatueshëm. "Rreziku i këputjes së kabllove nënujore nga armiqësitë gjithmonë ka ekzistuar, por një kërcënim i hapur nga një shtet si Irani e shton urgjencën", tha për Radion Evropa e Lirë Isik Mater, drejtoreshë e hulumtimeve në grupin NetBlocks me seli në Londër.