Irani po përgatit një projektligj të ri për menaxhimin e kalimit nëpër Ngushticën e Hormuzit, rrugën detare strategjike për transportin e naftës. Lajmi u bë i ditur nga nënkryetari i parlamentit iranian, Hamidreza Haji-Babaei sipas një burimi dhe Ali Nikzad sipas të tjerëve.
Projekti, i quajtur “Plani i menaxhimit të Ngushticës së Hormuzit”, përfshin 12 klauzola që vendosin rregulla më të rrepta. Anijet izraelite nuk lejohen të kalojnë fare. Për anijet nga “shtetet armike” ose “vendet ndërluftuese” parashikohet ndalim, përveç rasteve kur paguhen dëmshpërblime lufte.
Anijet e tjera mund të kalojnë vetëm pas miratimit dhe autorizimit nga autoritetet iraniane. Irani ka deklaruar se synon të vendosë tarifa për kalimin dhe nuk do të lejojë kthimin në gjendjen e mëparshme të lundrimit të lirë pas konfliktit.
Ali Nikzad e ka krahasuar nismën me shtetëzimin e industrisë së naftës pas Revolucionit Islamik të 1979-s. Ai theksoi se trafiku detar nuk do të kthehet në normalitetin para luftës, duke sinjalizuar kontroll më të ashpër mbi këtë pikë kyçe të tregtisë globale të energjisë.