Protestat e zhvilluara gjatë 5 ditëve të fundit kundër projektit të investimit në Zvërnec janë shoqëruar me tensione ndaj përfaqësuesve të medias. Sipas raportimeve, qytetarët pjesëmarrës kanë kërkuar shpesh bojkotimin e mediave, ndërsa gazetarët në terren kanë denoncuar përballjen me tentativa për pengim dhe intimidim gjatë ushtrimit të detyrës.
Në një reagim zyrtar, Asociacioni i Gazetarëve të Shqipërisë (AGSH) nënvizoi se e drejta për të protestuar është një shtyllë e demokracisë, por sqaroi rolin e gazetarëve në këtë proces. Sipas AGSH, stafi mediatik nuk është palë në protestë, por ndodhet aty për të dokumentuar ngjarjen, për të informuar publikun dhe për të siguruar pasqyrimin e zërit të protestuesve tek një audiencë sa më e gjerë.
"Sulmet, intimidimet apo pengimi i punës së tyre nuk i shërbejnë kauzës së askujt dhe cenojnë të drejtën e publikut për t’u informuar", thuhet në deklaratën e AGSH. Institucioni u ka bërë thirrje protestuesve dhe qytetarëve që të tregojnë respekt ndaj gazetarëve që raportojnë nga terreni, pavarësisht pakënaqësive që mund të kenë lidhur me mënyrën e pasqyrimit të këtyre zhvillimeve.