Rexhep Qosja, akademik dhe shkrimtar i njohur, u nda nga jeta më 23 prill 2026 në moshën 89-vjeçare dhe u varros në varrezat e qytetit të Prishtinës. Familjarët e ngushtë e përcjellën drejt banesës së fundit pa bujë e pa ceremoni të gjerë mortore, sipas dëshirës së tij. Ata nuk organizuan pritje për ngushëllime dhe nuk morën pjesë në organizime institucionale.
Qosja lindi më 1936 në Vuthaj të Malit të Zi. Katër klasat e para të shkollës fillore i kreu në Vuthaj, gjysmëmaturën në Guci. Më 1959 mbaroi Shkollën Normale në Prishtinë, u regjistrua më 1960 në Degën e Gjuhës dhe Letërsisë Shqipe të Fakultetit Filozofik të Prishtinës dhe u diplomua më 1964. Më 1967 u pranua asistent në Institutin Albanologjik të Prishtinës dhe specializoi letërsinë në Universitetin e Beogradit.
Në 1969 u zgjodh bashkëpunëtor shkencor, ndërsa më 1971 mbrojti doktoraturën për jetën dhe krijimtarinë e Asdrenit. Më 1972 u bë bashkëpunëtor i lartë, këshilltar shkencor, profesor inordinar e ordinar, si dhe drejtor i Institutit Albanologjik deri më 1981. Qe shef i Degës së Letërsisë dhe Gjuhës Shqipe në Fakultetin Filozofik dhe kryeredaktor i jashtëm i revistës Jeta e Re në 1974-1975.
Ai botoi mbi 30 libra me studime letrare, kritikë, prozë artistike, tregime, romane, drama, publicistikë e polemika. Ka botuar recensione, vështrime, artikuj e studime në revista shkencore. Disa vepra u përkthyen në gjuhë të tjera. Midis veprave: Episode letrare (1967), Dialogje me shkrimtarët (1968), Asdreni – jeta dhe vepra e tij (1972), Panteoni i rralluar (1973).
Për krijimtarinë u çmua me shpërblimin e Prishtinës (1968), Shpërblimin Krahinor të Dhjetorit (1969), dy shpërblime të SHSH të Kosovës (1972, 1974) dhe çmimin “Nderi i Kombit” nga Republika e Shqipërisë më 2000. U angazhua edhe në politikë, duke drejtuar një parti në Kosovë nga 1998 deri më 2000.