Agim Shahini, kryetari i Aleancës Kosovare të Bizneseve (AKB), ka paralajmëruar se protestat e transportuesve në Ballkanin Perëndimor dhe kufizimet e reja të Bashkimit Evropian po shkaktojnë humbje të mëdha ekonomike, shtrenjtojnë transportin dhe rrezikojnë mungesën e produkteve në Kosovë dhe rajon.
Shahini, në një deklaratë për Ekonomia Online, shpjegoi se vendimi i BE-së lejon shoferët nga Ballkani Perëndimor të qëndrojnë jo më shumë se 90 ditë në çdo gjashtëmujor në zonën Shengen, gjithsej 180 ditë në vit. Kjo masë i trajton ata si turistë dhe ka nxitur revoltë të madhe në sektorin e transportit.
Sipas tij, pas zbatimit të sistemit EES, që regjistron hyrjet dhe daljet në BE, transportuesit po kërkojnë leje speciale. Këto leje do t'i trajtonin shoferët si punëtorë dhe jo si vizitorë, duke shmangur kufizimet në lëvizje.
Bllokadat kanë krijuar pasiguri në transportin ndërkombëtar dhe mund të çojnë në tollovi si dhe mungesa të produkteve esenciale.
Përditësime
AKB raporton se rreth 20 mijë kamionë janë të bllokuar midis Ballkanit Perëndimor dhe Evropës.
Kostoja ditore arrin rreth 1 miliard euro për importet dhe eksportet midis BE-së dhe Ballkanit Perëndimor.