Oda Ekonomike Amerikane në Kosovë (OEAK) ka reaguar për çrregullimet në lëvizjen e mallrave ndërmjet Bashkimit Evropian, korridoreve rajonale të transitit dhe Republikës së Kosovës. Më 29 janar 2026, kjo lidhet me bllokadat e vendkalimeve kufitare nga shoferët e kamionëve në disa shtete të rajonit, të ndërlidhura me zbatimin e rregullave të reja të hyrjes në BE dhe sistemin EES.
OEAK thekson se lëvizja e lirë e mallrave dhe funksionimi i pandërprerë i transportit rrugor janë thelbësore për zinxhirët e furnizimit, aktivitetin ekonomik dhe integrimin me tregun unik të BE-së.
Ndërprerjet po ndikojnë te bizneset me vonesa në dërgesa, rrezik mospërmbushjeje kontratash, humbje financiare dhe mundësi humbjeje klientësh ndërkombëtarë. Ndërprerjet e zgjatura cenojnë furnizimin, rrisin shpenzimet operative dhe mund të çojnë në rritje çmimesh për konsumatorë.
Kosova, e varur shumë nga importi dhe tranziti rajonal, përballet me probleme në planifikimin e investimeve, ciklet e prodhimit dhe afatet e dorëzimit. OEAK i bën thirrje Komisionit Evropian të angazhohet urgjentisht për zgjidhje të balancuara dhe të qëndrueshme në transportin ndërkombëtar dhe zinxhirët ndërkufitarë.
Oda inkurajon të gjitha palët për dialog konstruktiv drejt zgjidhjeve praktike, të parashikueshme dhe afatgjata që sigurojnë lëvizje të pandërprerë të mallrave.