Mëngjesin e kësaj të premteje, në aksin rrugor Kardhiq-Delvinë, në vendin e quajtur Fushë Vërri, është regjistruar një aksident me pasojë vdekjen e një personi dhe plagosjen e tre të tjerëve.
Në aksident janë përfshirë dy automjete që janë përplasur me njëra-tjetrën. Si pasojë e goditjes, automjeti me targa AA 246 RC ka dalë nga rruga dhe është përmbysur, ndërsa mjeti tjetër, një Audi me targa AB 558 XR, ka pësuar dëmtime të shumta materiale.
Shërbimet e Policisë, ekipet mjekësore të Ambulancës dhe forcat e Zjarrfikëses kanë mbërritur menjëherë në vendin e ngjarjes për t'u ardhur në ndihmë të personave të lënduar dhe për të kryer veprimet procedurale. Grupi hetimor po punon për të përcaktuar rrethanat dhe shkaqet që çuan në këtë përplasje.
Përditësime
Policia ka identifikuar viktimën e aksidentit të 5 qershorit në aksin Kardhiq-Delvinë si Orest Mahmutaj, 20 vjeç, nga Lazarati, i cili udhëtonte me të vëllain. Tre të plagosurit e tjerë, Shyqyri Liko, Dalip Troka dhe Erjon Barjamaj nga Fieri, ndodhen jashtë rrezikut për jetën dhe po transportohen drejt Spitalit Rajonal të Vlorës për trajtim të specializuar.