Një aksident i rëndë trafiku ka ndodhur të dielën, më 09 gusht 2026, rreth orës 16:30, në fshatin Muhovc të Ferizajt. Sipas zëdhënësit të Policisë për rajonin e Ferizajt, Kanun Veseli, në automjetin me targa vendore ndodheshin dy persona.
Si pasojë e përplasjes, njëri nga të pranishmit ka ndërruar jetë, ndërsa personi tjetër ka pësuar lëndime dhe është dërguar për ndihmë mjekësore në Qendrën Emergjente të Ferizajt. Në vendin e ngjarjes kanë mbërritur menjëherë njësitet e Stacionit Policor, Njësia Rajonale e Komunikacionit Rrugor dhe shërbimet e emergjencës. Lidhur me këtë rast është njoftuar prokurori i shtetit. Njësitet kompetente kanë nisur hetimet për të zbardhur rrethanat dhe shkaqet që çuan në këtë ngjarje.
Përditësime
Hetimet e autoriteteve konfirmuan se aksidenti ishte vetaksident, i shkaktuar nga mospërshtatja e shpejtësisë. Viktima e ngjarjes është 13-vjeçari me inicialet L.I. nga fshati Prelez, i cili po drejtonte automjetin e tipit Mercedes. Pasagjeri i lënduar është 16-vjeçari me inicialet A.H., i cili po vazhdon trajtimin mjekësor.