Një aksident rrugor ka ndodhur në perëndim të Meksikës, ku një autobus turistik u përmbys pranë qytetit Amatlán de Cañas në shtetin Nayarit. Ngjarja ndodhi gjatë fundjavës festive të Ditës së Punës.
Autobusi transportonte pasagjerë nga shteti Jalisco drejt një qendre rekreative në Nayarit. Ai doli nga autostrada dhe u përmbys. Sipas autoriteteve, 11 persona humbën jetën: gjashtë në vendngjarje dhe pesë të tjerë në spital nga plagët e marra. 31 të plagosur sipas qeverisë së Nayarit, ndërsa bilancet e tjera flasin për mbi 30 të tillë, disa në gjendje të rëndë.
Ekipet e emergjencës nga Nayarit dhe Jalisco ndërhynë për shpëtimin dhe hetimin. Rruga u mbyll për operacionet. Fotot e qeverisë tregojnë autobusin të përmbysur dhe të mbuluar me baltë.
Shkaqet e aksidentit nuk janë sqaruar ende nga autoritetet.
Aksidentet rrugore me pasoja fatale janë të shpeshta në Meksikë. Në shtatorin e kaluar, 10 persona vdiqën dhe mbi 60 u plagosën kur një tren mallrash u përplas me një autobus në qendër të vendit. Në shkurt 2025, mbi 40 persona humbën jetën në jug, pas përplasjes së një autobusi nga Tabasco drejt Cancún me një kamion që çoi në shpërthim zjarri.
Autobusët janë mjet kryesor transporti në Meksikë, ku rrjeti hekurudhor i pasagjerëve është i kufizuar. Qeveria e presidentes Claudia Sheinbaum po zgjeron këtë rrjet për të lidhur pjesë të veriut dhe qendrës.