Të paktën 16 persona kanë humbur jetën dhe 28 të tjerë kanë mbetur të plagosur pas një aksidenti me autobus të ndodhur në provincën e Sinait të Jugut në Egjipt. Ngjarja u regjistrua në rrugën Dahab-Nuweiba, para zonës Al-Saada, në drejtim të Nuweibës, ku mjeti u përmbys gjatë udhëtimit.
Ministria egjiptiane e Shëndetësisë njoftoi se në vendngjarje u dërguan 20 ambulanca për të ofruar ndihmën e parë dhe për të transportuar të mbijetuarit drejt spitaleve. Zëdhënësi i ministrisë, Hossam Abdel Ghaffar, konfirmoi se të vdekurit u shpallën në vendngjarje, ndërsa ministri i Shëndetësisë, Khaled Abdel Ghaffar, ka urdhëruar institucionet shëndetësore që të rrisin nivelin e gatishmërisë për trajtimin e të plagosurve.
Ndërkohë që shkaqet dhe rrethanat e sakta të aksidentit janë ende nën hetim, autoritetet nuk kanë konfirmuar detaje shtesë mbi dinamikën e përmbysjes. Aksidentet rrugore mbeten një çështje shqetësuese në Egjipt, ku gjatë vitit 2025 u raportuan rreth 6 mijë viktima nga përplasje të ndryshme, shpesh si pasojë e pakujdesisë ose gjendjes së dobët të akseve rrugore.