Një aksident i rëndë rrugor ka ndodhur të premten në provincën bregdetare Boumerdes, në lindje të kryeqytetit të Algjerisë, Algjer. Një autobus pasagjerësh, i cili po udhëtonte nga provinca Setif, doli nga rruga dhe u përmbys në një përrua, duke shkaktuar humbjen e jetës së të paktën 25 personave dhe plagosjen e 44 të tjerëve.
Ekipet e Mbrojtjes Civile njoftuan se ndërhynë në vendngjarje rreth orës 09:40 me kohën lokale për t'u ardhur në ndihmë viktimave dhe për të nxjerrë të mbijetuarit nga mjeti i dëmtuar. Të lënduarit janë transportuar menjëherë në spitalet më të afërta për të marrë trajtimin e nevojshëm mjekësor. Autoritetet kanë paralajmëruar se bilanci i viktimave mund të rritet, ndërkohë që janë duke u zhvilluar hetime për të përcaktuar shkaqet e sakta të kësaj tragjedie.
Ky aksident konsiderohet si një ndër më vdekjeprurësit në Algjeri në vitet e fundit. Siguria rrugore mbetet një shqetësim i vazhdueshëm në vend, ku faktorët njerëzorë, si shpejtësia tej normave të lejuara, identifikohen nga autoritetet si shkaktarët kryesorë të aksidenteve. Statistikat zyrtare tregojnë se gjatë vitit 2025, në aksidente trafiku në këtë vend kanë humbur jetën 3,838 persona, ndërsa mbi 37,000 të tjerë kanë mbetur të plagosur.
Sipas raporteve, në aksidentin e fundit ishin përfshirë pasagjerë që po udhëtonin drejt zonave bregdetare për pushime. Autoritetet lokale dhe ato të sigurisë vazhdojnë monitorimin e situatës, ndërsa opinioni publik në vend është tronditur nga ky ngjarje e rëndë.
Përditësime
Bilanci i viktimave nga aksidenti tragjik me autobus në provincën Boumerdes, Algjeri, është rritur në 27 të vdekur. Ministri i Shëndetësisë vizitoi të mbijetuarit në spital, duke konfirmuar se disa prej të plagosurve mbeten në gjendje të rëndë dhe duke garantuar angazhimin maksimal të strukturave mjekësore për trajtimin e tyre.