Një aksident automobilistik është regjistruar mëngjesin e sotëm në aksin rrugor Fier-Lushnjë, në afërsi të fshatit Kolonjë. Një automjet i tipit Audi, i cili po lëvizte në drejtim të Lushnjës, ka humbur kontrollin dhe ka dalë nga karrexhata, duke përfunduar në nënkalimin që lidh autostradën me zonën e Kolonjës.
Si pasojë e përplasjes, automjeti ka pësuar dëme të konsiderueshme materiale. Drejtuesi i mjetit ka marrë lëndime të lehta dhe është dërguar me urgjencë drejt Spitalit të Lushnjës, ku po merr ndihmën e nevojshme mjekësore. Sipas informacioneve paraprake, ai ndodhet jashtë rrezikut për jetën.
Në vendngjarje kanë mbërritur menjëherë forcat e Policisë Rrugore, të cilat kanë kryer veprimet procedurale dhe kanë nisur punën për zbardhjen e plotë të rrethanave të këtij incidenti. Sipas dyshimeve paraprake, shkaku i daljes nga rruga ka qenë një manovër e gabuar e drejtuesit të mjetit. Nga ky aksident nuk ka pasur persona të tjerë të lënduar apo automjete të tjera të përfshira në ngjarje. Aktualisht, pritet ekspertiza shkencore e policisë për të përcaktuar me saktësi shkaqet përfundimtare të aksidentit.