Një aksident rrugor është regjistruar këtë të diel në aksin që lidh qytetin e Fierit me Semanin. Një automjet tip Mercedes-Benz ka dalë nga rruga dhe ka përfunduar në kanalin anësor në afërsi të fshatit Fermë Çlirim. Si pasojë e përplasjes, drejtuesja e mjetit ka marrë lëndime dhe është transportuar për në Spitalin Rajonal të Fierit për të marrë kujdesin e nevojshëm mjekësor.
Në vendngjarje kanë mbërritur shërbimet e Policisë Rrugore dhe grupi hetimor, të cilët kanë nisur verifikimet për të përcaktuar shkaqet dhe rrethanat e plota të ngjarjes. Ky aks rrugor është bërë shpesh objekt i raportimeve për shkak të numrit të lartë të aksidenteve të ndodhura në këtë segment, veçanërisht gjatë periudhës së verës.
Grupi hetimor vazhdon punën për dokumentimin e plotë të shkaqeve që çuan në daljen nga rruga të automjetit.