Një aksident rrugor ka ndodhur mbrëmjen e sotme në aksin kombëtar Gramsh-Cërrik, ku një këmbësore është përplasur nga një motor. Ngjarja është regjistruar rreth orës 18:25, ndërsa dyshohet se drejtuesi i mjetit po qarkullonte me shpejtësi. Si pasojë e goditjes, gruaja ka rënë në asfalt dhe ka pësuar dëmtime të shumta trupore, duke humbur përkohësisht ndjenjat në vendin e ngjarjes.
Pas përplasjes, drejtuesi i motorit ka ndaluar një automjet që po kalonte në atë segment rrugor. Me ndihmën e drejtuesit të automjetit tjetër, ai ka transportuar të dëmtuarën në spital për të marrë ndihmën mjekësore të nevojshme. Pas këtij veprimi, drejtuesi i motorit ka braktisur mjetin e tij dhe është larguar nga vendngjarja në drejtim të paditur.
Shërbimet e Policisë janë njoftuar për ngjarjen dhe pritet të kryejnë veprimet procedurale për dokumentimin e plotë të aksidentit. Grupi hetimor është duke punuar për të sqaruar rrethanat e plota dhe për të identifikuar drejtuesin e motorit, i cili aktualisht ndodhet në kërkim.