Një aksident rrugor është regjistruar mesditën e kësaj të hëne, rreth orës 14:05, në afërsi të qytetit të Gramshit. Sipas të dhënave paraprake, një automjet, që dyshohet se po lëvizte me shpejtësi të lartë, ka humbur kontrollin gjatë qarkullimit.
Për pasojë, mjeti ka dalë nga rruga dhe është rrokullisur disa herë, duke përfunduar i përmbysur në anën tjetër. Nga ky incident kanë mbetur të plagosur drejtuesi i automjetit dhe një pasagjer, të cilët janë nxjerrë nga mjeti dhe janë dërguar në spital për të marrë ndihmën e nevojshme mjekësore. Deri më tani, nuk ka ende detaje mbi gjendjen e tyre shëndetësore.
Në vendngjarje kanë mbërritur shërbimet e Policisë dhe ekipet e urgjencës, të cilat kanë siguruar zonën dhe kanë kryer veprimet e para hetimore. Grupi hetimor po vijon punën për të dokumentuar rrethanat dhe për të përcaktuar me saktësi dinamikën e plotë të aksidentit.