Gjatë orëve të natës në fshatin Çekrez të bashkisë Gramsh, një çift bashkëshortësh ka mbetur i plagosur pas një aksidenti rrugor. Ngjarja ka ndodhur kur drejtuesi i motorit ka humbur kontrollin e mjetit pas daljes së papritur të një kali në rrugë, duke shkaktuar rrëzimin e tyre në asfalt.
Pas sinjalizimit, në vendngjarje kanë mbërritur shërbimet e Policisë së Gramshit dhe ekipet e urgjencës mjekësore. Pas ndihmës së parë të dhënë në vend, çifti është dërguar në Spitalin e Gramshit. Pas një kontrolli mjekësor që zgjati rreth një orë, për shkak të dëmtimeve të marra, mjekët kanë vendosur transportimin e tyre drejt Spitalit të Traumës në Tiranë për trajtim më të specializuar.
Policia ka nisur hetimet për zbardhjen e rrethanave të plota të ngjarjes, e cila shton shqetësimin në lidhje me praninë e kafshëve të pambikëqyra në akset rrugore gjatë orëve të errësirës.