Një aksident rrugor është regjistruar më 26 janar 2026 në aksin Kabash-Porocan, në territorin e Bashkisë Gramsh, pranë fshatit Bardhan.
Një mjet tip kamion ka dalë nga rruga dhe ka rënë në humnerë. Në të udhëtonin tre persona, pjesë e personelit të shërbimit në zona rurale: një mësuese, një infermiere dhe drejtuesi i mjetit.
Si pasojë, mësuesja dhe drejtuesi i mjetit kanë humbur jetën në vendngjarje. Infermierja është transportuar me urgjencë në spital dhe ndodhet në gjendje shumë të rëndë, kritike për jetën.
Sipas një burimi, emrat e personave të përfshirë janë Albana Boja (mësuese), Shaban Kotorri (drejtues i mjetit) dhe Dëshira Hoxha (infermiere).
Forcat e policisë, shërbimet e emergjencës dhe grupi hetimor kanë mbërritur në vendngjarje. Hetimet janë në vijim për zbardhjen e shkaqeve.
Paraprakisht dyshohet se rruga e vështirë dhe kushtet e terrenit kanë ndikuar në humbjen e kontrollit të mjetit. Ekspertiza autoteknike do të përcaktojë rrethanat e plota.
Përditësime
Policia e Shtetit ka konfirmuar një të vdekur dhe dy të plagosur rëndë nga rëzimi i një kamioni në Gramsh, duke korrigjuar raportimet fillestare.
- Infermierja Dëshira Hoxha (43 vjeçe, D.H.) humbi jetën.
- Mësuesja Albana Boja (40 vjeçe, A.B.) është transportuar në Spitalin e Traumës në Tiranë.
- Drejtuesi Shaban Kotorri (38 vjeç, Sh.K.) ndodhet në Spitalin e Gramshit.
Konfuzionin fillestar e shkaktoi deklarata e shoferit në sallën operative. Kamioni me targa AA661CN ra në një humnerë rreth 70 metra të thellë.
Policia e Shtetit ka arrestuar drejtuesin Shaban Kotorri për "Drejtim të parregullt të automjeteve" me pasojë vdekjen e një personi.
Të plagosurit Albana Boja dhe Shaban Kotorri janë jashtë rrezikut për jetën, konfirmoi policia.