Një aksident rrugor ndodhi mbrëmjen e së premtes në zonën e Fanit, në Mirditë, ku për pasojë gjashtë të mitur, të gjithë kushërinj me njëri-tjetrin, morën dëmtime trupore. Sipas të dhënave paraprake, shkak i aksidentit dyshohet se ka qenë humbja e kontrollit të automjetit nga një 16-vjeçar, i cili nuk kishte leje drejtimi.
Automjeti është përplasur me një shtyllë ndriçimi gjatë lëvizjes. Si pasojë e goditjes, të gjashtë të miturit pësuan lëndime. Një 12-vjeçare dyshohet se ka pësuar thyerje të legenit, ndërsa dy të mitur të tjerë kanë marrë fraktura në gjymtyrë. Katër të miturit e tjerë kanë pësuar dëmtime të ndryshme.
Në vendngjarje mbërritën shërbimet e Policisë dhe grupi hetimor, të cilët kryen veprimet procedurale. Për transportimin e të plagosurve drejt spitaleve në Tiranë, për trajtim më të specializuar, u angazhuan gjashtë autoambulanca. Sipas informacioneve të deritanishme, gjendja shëndetësore e të miturve është jashtë rrezikut për jetën. Ndërkohë, 16-vjeçari është proceduar penalisht, ndërsa hetimet për zbardhjen e plotë të shkaqeve të ngjarjes vijojnë.