Një aksident është regjistruar pasditen e së shtunës, më 1 Gusht 2026, në një subjekt privat minerar në zonën e Tërnovës së Madhe, pjesë e Njësisë Administrative Zerqan në Bashkinë Bulqizë. Si pasojë e një incidenti gjatë punës, një minator, i identifikuar me inicialet I.K., ka mbetur i bllokuar në thellësi të galerisë.
Në vendngjarje kanë mbërritur forcat e policisë, grupet e emergjencës dhe ekipet e specializuara të shpëtimit. Aktualisht, këto forca po vijojnë operacionin për nxjerrjen e minatorit. Ndonëse nga të dhënat paraprake ekzistojnë dyshime se aksidenti mund të ketë shkaktuar humbjen e jetës së shtetasit I.K., ky informacion mbetet ende pa një konfirmim zyrtar nga autoritetet përkatëse. Grupi hetimor ndodhet në vendngjarje dhe po punon për zbardhjen e shkaqeve dhe rrethanave të plota të kësaj ngjarjeje.
Sipas informacioneve të siguruara, aksidenti ka shkaktuar shqetësim në komunitetin lokal, ndërsa ekipet e specializuara po përpiqen të operojnë në kushte të vështira të galerisë për të nxjerrë minatorin. Autoritetet pritet të dalin me një deklaratë zyrtare sapo operacioni i kërkim-shpëtimit të përfundojë dhe të verifikohet gjendja shëndetësore e minatorit.
Përditësime
Autoritetet kanë identifikuar viktimën e aksidentit në minierën e Tërnovës, Bulqizë, si Ilir Kalaveri, 40 vjeç, nga Burreli. Kryepunëtori (brigadieri) humbi jetën rreth orës 13:00, pasi ra në një furnelë dhe u mbulua nga masa e kromit. Ngjarja ndodhi në galerinë që administrohet nga subjekti privat Eternal Security.
Ekipet e shpëtimit vijuan operacionin gjatë gjithë natës për gjetjen e minatorit Ilir Kalaveri në minierën e Tërnovës. Puna mbetet komplekse për shkak të rrezikut të lartë të shembjeve të reja. Ky aksident vjen pas tragjedisë së vitit 2021, ku humbi jetën minatori Muharrem Plaku.