Specialistët për Hetimin e Krimeve pranë Komisariatit të Policisë Bulqizë arrestuan shtetasin Përparim Koçi, 63 vjeç, banues në fshatin Vajkal, me detyrë drejtues teknik në një subjekt minerar. Arrestimi i tij është bërë në kuadër të veprimeve hetimore për aksidentin fatal të ndodhur më 1 gusht 2026, ku humbi jetën minatori Ilir Kolaveri, 40 vjeç.
Sipas njoftimit zyrtar të Policisë, dyshohet se 63-vjeçari nuk ka zbatuar rregullat e mbrojtjes në punë, mangësi që solli si pasojë aksidentin tragjik. Trupi i pajetë i 40-vjeçarit u nxor nga miniera një ditë pas ngjarjes. Burime bëjnë me dije se në polici është shoqëruar për t'u marrë në pyetje edhe drejtuesi tjetër teknik, Rremzi Pupli.
Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër. I arrestuari akuzohet për veprën penale "Shkelja e rregullave të mbrojtjes në punë".
Sqarim: Çdo person prezumohet i pafajshëm derisa fajësia e tij të vërtetohet me vendim gjyqësor të formës së prerë.
Përditësime
Policia ka arrestuar drejtuesin teknik të minierës në Tërnovë, pas aksidentit fatal ku humbi jetën brigadieri Ilir Kolaveri, banues në Burrel. Viktima u mbulua nga një masiv minerali kromi pasi ra në një furnelë. Autoritetet po vijojnë hetimet për të verifikuar kushtet e sigurisë në subjektin 'Eternal Security'.