Një aksident i rëndë është regjistruar paraditen e sotme në qytetin e Vlorës, në segmentin e njohur si Bulevardi i Ri, në afërsi të gjimnazit “Halim Xhelo”. Një automjet është përplasur me një monopatinë elektrike, duke shkaktuar plagosjen e rëndë të drejtuesit të mjetit elektrik. I dëmtuari është dërguar në spital për të marrë ndihmën e nevojshme mjekësore.
Në vendin e ngjarjes kanë mbërritur shërbimet e Policisë së Shtetit, të cilat kanë bllokuar rrugën për të kryer veprimet hetimore dhe për të dokumentuar dinamikën e plotë të përplasjes.
Aksi në fjalë ka pësuar ndryshime infrastrukturore kohët e fundit. Bulevardi, i cili më parë shërbente me një kalim, është riorganizuar së fundmi me dy korsi në përpjekje për të lehtësuar fluksin e mjeteve dhe për të shmangur trafikun në këtë zonë të qytetit. Autoritetet vijojnë punën për zbardhjen e shkaqeve konkrete të aksidentit.