Një aksident rrugor është regjistruar në Elbasan, pranë lagjes Skënderbej, e njohur ndryshe si Fushë Mbret. Automjeti ka dalë nga rruga dhe ka përfunduar në përroin e Zaranikës, ku shihet i përmbysur me dëmtime të dukshme.
Sipas pamjeve nga vendngjarja, mjeti ka rënë në përroin anësor. Deri tani nuk raportohet për persona të lënduar. Sipas informacioneve paraprake, drejtuesi i mjetit ka dalë vetë nga automjeti pa pësuar dëmtime.
Forcat e policisë dhe grupi hetimor kanë mbërritur menjëherë në vendngjarje. Ato po punojnë për zbardhjen e rrethanave, mbledhjen e provave dhe izolimin e zonës. Autoritetet kërkojnë nga qytetarët të shmangin kalimin në zonë për të lehtësuar punën e forcave të rendit dhe ekipeve të emergjencës.
Hetimet vazhdojnë për të përcaktuar shkaqet e aksidentit.