Një aksident me pasojë vdekjen u regjistrua më datë 2 qershor 2026 në aksin rrugor Laç-Patok. Ngjarja ndodhi rreth orës 13:00, kur automjeti i drejtuar nga shtetasja A. S., 33 vjeçe, banuese në fshatin Grëz, u përplas me një ciklomotor që drejtohej nga shtetasi L. T., 37 vjeç, banues në Fushë-Kuqe.
Pas përplasjes, L. T. u transportua me urgjencë për në Spitalin e Traumës në Tiranë në gjendje të rëndë shëndetësore. Pavarësisht përpjekjeve të personelit mjekësor, ai nuk mundi t'u mbijetonte plagëve të marra dhe ndërroi jetë rreth orës 18:40.
Specialistët e Qarkullimit Rrugor arrestuan në flagrancë 33-vjeçaren A. S. për veprën penale "Shkelja e rregullave të qarkullimit rrugor", me pasojë vdekjen e një personi. Materialet procedurale i janë referuar Prokurorisë për veprime të mëtejshme hetimore, me qëllim zbardhjen e plotë të rrethanave të kësaj ngjarjeje.