Një aksident me pasojë vdekjen është shënuar mbrëmjen e datës 5 qershor 2026 në aksin rrugor Vlorë-Fier, në zonën e Novoselës. Një këmbësor ka humbur jetën në vendngjarje pasi u përplas nga një automjet, ndërsa po tentonte të kalonte autostradën.
Sipas informacioneve paraprake, përplasja ka qenë fatale, duke i shkaktuar viktimës dëmtime të rënda trupore. Burime bëjnë me dije se viktima dyshohet të jetë një person endacak, ndërsa identiteti i tij mbetet ende i pakonfirmuar nga autoritetet.
Për shkak të aksidentit, qarkullimi i automjeteve në segmentin Levan-Novoselë u bllokua për një periudhë kohore, duke shkaktuar radhë të gjata në të dyja krahët e lëvizjes. Forcat e Policisë dhe shërbimet e emergjencës kanë mbërritur menjëherë në vendngjarje për kryerjen e veprimeve procedurale, zbardhjen e shkaqeve të aksidentit dhe normalizimin e trafikut.