Që nga orët e hershme të mëngjesit të datës 1 korrik 2026, një operacion i gjerë policor është duke u zhvilluar në disa zona të Kosovës. Aksioni po udhëhiqet nga Prokuroria Speciale dhe përfshin bashkëpunimin e Njësisë së Hetimeve Tatimore të ATK-së, Policisë së Kosovës dhe Njësisë së Hetimeve të Doganës së Kosovës.
Sipas informacioneve, operacioni përfshin bastisje në më shumë se 40 lokacione në mbarë vendin. Hetimet po zhvillohen mbi baza të dyshimeve për një skemë të organizuar kriminale në sektorin e derivateve të naftës. Dyshohet se kompani importuese nga Shqipëria, në bashkëpunim me biznese në Kosovë, mund të kenë importuar ujë në vend të naftës, duke përdorur kompani fiktive për të fshehur gjurmët e transaksioneve.
Autoritetet synojnë të zbardhin mënyrën e lëshimit të faturave fiktive për importe të pretenduara, me qëllim shmangien e detyrimeve tatimore dhe doganore, si dhe pastrimin e parave. Ky aksion, i cili është rezultat i një hetimi disa mujor, është ende në zhvillim e sipër, ndërsa ekipet e hetuesisë vazhdojnë kontrollet në terren për të siguruar prova lidhur me këto vepra penale.