Një operacion kërkimi dhe orientimi ka nisur në zonën e Majës së Jezercës pasi dy motoristë kanë humbur kontaktet dhe dyshohet se kanë humbur rrugën. Autoritetet dhe ekipet e specializuara po punojnë në terren për lokalizimin e tyre.
Sipas njoftimeve zyrtare, në këtë operacion është përfshirë Departamenti i Motoristëve i Shoqatës së Kosovës për Kërkim dhe Shpëtim, të cilët ndodhen në vendngjarje dhe po punojnë intensivisht për gjetjen e personave. Në mbështetje të këtij operacioni janë angazhuar edhe forcat e Policisë së Shtetit, të cilat po bashkëpunojnë me ekipet e kërkim-shpëtimit për të bërë të mundur gjetjen e tyre.
Kërkimet po zhvillohen në një nga zonat më të vështira të Alpeve Shqiptare, ku relievi i thyer malor e bën ndërlikuar operacionin. Deri në këto momente, nuk janë dhënë detaje mbi identitetin e motoristëve ose rrethanat specifike në të cilat ata kanë humbur rrugën.
Ekipet e shpëtimit shprehen se operacioni është ende në vijim dhe pritet të ketë informacione të reja në orët në vijim, me shpresën që motoristët të gjenden dhe të kthehen të sigurt.