Prokuroria Themelore në Mitrovicë njofton se në koordinim me Policinë e Kosovës ka realizuar aksion në fshatrat Bivolak, Zhilivodë dhe Stroc të komunës së Vushtrrisë, për shkak të dyshimeve për nxjerrje të paligjshme të thëngjillit në këto zona.
Gjatë aksionit u arrestuan 6 persona, të cilët do të intervistohen nga policia me dyshimin për kryerjen e veprave penale “Ndotja, degradimi ose shkatërrimi i mjedisit” dhe “Shkaktimi i rrezikut të përgjithshëm”.
Gjithashtu, u sekuestruan 3 eskavatorë, 6 kamioneta dhe 1 traktor, të cilat dyshohen se janë përdorur për kryerjen e këtyre veprave.
Prokuroria Themelore në Mitrovicë thekson se mbetet e përkushtuar në luftimin e veprave penale që cenojnë mjedisin dhe do të vazhdojë me vendosmëri ndjekjen penale të atyre që shkaktojnë dëme ndaj natyrës dhe pasurisë së përbashkët.