Prokuroria Themelore në Prizren ka ngritur aktakuzë kundër tre të pandehurish për posedim të 4.4 kg kokainë. Dy prej tyre janë të arrestuar, ndërsa i treti mbetet në arrati.
Një nga të pandehurit, Hëvzi Krabaj, i dënuar më parë për posedim narkotikësh, ka pranuar fajësinë gjatë procedurës në prokurori. Ai u shpreh i befasuar te të afërmit për arrestimin dhe dyshoi se u tradhtua nga miqtë. Në transkriptat e bisedave të familjarëve, të cituara në aktakuzë, Krabaj thotë: «ama kurrë s’ma ka marrë menja, se naj herë ta nin zemra që bie, ama m’kanë kapë tap-tap. Po dyshoj që dikush më ka qitë, ndonjë shok i imi. O tash u rujsha shumë se s’jam kanë t’u punu hiç, jam kanë t’u punu me 2 veta, 3 veta, o ti a din sa jam qetësu, po k’tu me ka qitë dikush».
Të pandehura e tjetër, Elmedina Rexhepi, nuk e ka pranuar fajësinë. Ajo deklaroi se nuk ka pasur dijeni për tregti narkotikësh dhe nuk e dinte se Fidan Husmani, në natën kritike të takimit me Krabaj, posedonte substancë narkotike. Sipas saj, takimi i fundit me Husmanin ka ndodhur kur u nisën drejt Shkupit.
Fidan Husmani, shtetas i Maqedonisë së Veriut dhe Belgjikës, sipas aktakuzës është partner i Rexhepit. Policia e Kosovës e kërkon atë që nga gushti i 2025-ës.