Aktivisti shqiptar Baki Goxhaj ka mbërritur në Stamboll të enjten më 21 maj 2026. Ai ishte ndër pjesëmarrësit e flotiljes “Sumud” që u ndaluan nga forcat izraelite disa ditë më parë gjatë një misioni për të dërguar ndihma humanitare në Gaza.
Negociatat e zhvilluara mes Ministrisë së Jashtme të Shqipërisë dhe institucioneve izraelite bënë të mundur kontaktin fillestar dhe më pas dërgimin e aktivistit drejt Turqisë. Shteti turk organizoi operacione të posaçme për rikthimin e aktivistëve humanitarë të flotës “Sumud”, të cilët ishin mbajtur për 48 orë në Izrael pasi u kapën 450 kilometra larg brigjeve të Gazës të hënën.
Ministri shqiptar për Evropën dhe Punët e Jashtme Ferit Hoxha e cilësoi ndalimin si një veprim të patolerueshëm dhe të papranueshëm. Nga ana tjetër, kryeministri izraelit Benjamin Netanyahu deklaroi se Izraeli ka të drejtën të mbrojë hapësirën e tij dhe përgëzoi marinën ushtarake për operacionin.