Autoriteti Kombëtar i Ushqimit (AKU) në Shkodër, në bashkëpunim me Policinë e Shkodrës, ka kryer një inspektim jashtë planit në subjektin Elidon Bala, me aktivitet trajtim dhe ambalazhim fruta-perime.
Gjatë verifikimeve në terren u konstatuan shkelje të rënda në lidhje me respektimin e standardeve higjeno-sanitare në ambientet ku trajtohet produkti ushqimor.
Për këto shkelje, AKU mori masa administrative të menjëhershme:
- Gjobë në vlerën 500.000 lekë, referuar Ligjit nr. 9863, datë 28.01.2008 "Për Ushqimin" (i ndryshuar), bazuar në nenin 68, pika 1, gërma (h), për kundërshtim me nenin 23 mbi kushtet higjieno-sanitare;
- Ndërprerje e menjëhershme e aktivitetit prodhues, sipas Ligjit nr. 99/2024 "Për Inspektimin në Republikën e Shqipërisë", neni 46, pika 1, si masë urgjente për rrezik serioz ndaj interesit publik dhe sigurisë ushqimore;
- Bllokim i produktit në sasinë 110 ton, deri në përfundim të procedurave ligjore dhe vendimmarrjes për asgjësim, në përputhje me legjislacionin në fuqi.
Aksioni u ndërmor në kuadër të garantimit të sigurisë ushqimore në vend.