Ministri i Bujqësisë dhe Zhvillimit Rural, Andis Salla, deklaroi se me fillimin e vitit të ri shkollor, Autoriteti Kombëtar i Ushqimit (AKU) ka ndërmarrë një fushatë intensive kontrollesh në terren. Masat përqendrohen në mensat e shkollave, kopshteve dhe çerdheve, si dhe te subjektet tregtare që ushtrojnë aktivitet në afërsi të institucioneve arsimore.
Sipas ministrit, qëllimi i këtij aksioni është garantimi i standardeve të sigurisë për ushqimet që konsumojnë fëmijët. Vetëm gjatë javës së fundit janë zhvilluar 75 inspektime, gjatë të cilave janë marrë edhe mostra për analiza laboratorike. Në rastet kur janë konstatuar shkelje apo mangësi të kërkesave ligjore, janë marrë masa administrative ndaj operatorëve përkatës.
Ministri Andis Salla nënvizoi se ky proces monitorimi nuk do të jetë i kufizuar vetëm në fazën fillestare të vitit shkollor, por do të vijojë përgjatë gjithë periudhës mësimore. Vëmendje e posaçme i kushtohet subjekteve që ofrojnë ushqim për fëmijët, duke e konsideruar këtë aspekt si thelbësor për mirëqenien dhe zhvillimin e tyre. Sipas tij, për sigurinë ushqimore në këto institucione nuk do të ketë kompromis dhe AKU do të mbetet aktive në terren për të siguruar zbatimin e rregullave të vendosura për mbrojtjen e shëndetit publik.