Autoriteti Kombëtar i Ushqimit (AKU) ka njoftuar një rrezik për sigurinë ushqimore pas sinjalizimit nga Sistemi Evropian i Alarmit për Ushqimin (RASFF) për praninë e acidit hidrocianik mbi vlerat e lejuara te produkti "BLANCHED ALMOND EXTRA FINE".
Sipas të dhënave zyrtare, produkti mban lotin LO12200001 dhe është eksportuar nga kompania spanjolle Dryfo Menexopoulos Bros SA. Në Shqipëri, ky produkt është importuar nga tre subjekte: Albania Smart Distribution sh.p.k., N.N sh.p.k., dhe Alta Group.
Sasia totale e importuar prej 1,200 kilogramësh është shpërndarë si më poshtë:
- 1,100 kilogramë nga subjektet Albania Smart Distribution dhe N.N, të cilat rezultojnë të shitura te konsumatori fundor.
- 100 kilogramë nga subjekti Alta Group, ku 42 kilogramë janë bllokuar nga autoritetet për asgjësim, ndërsa 58 kilogramë janë shitur.
AKU u bën thirrje qytetarëve që kanë blerë këtë produkt të mos e konsumojnë atë dhe ta kthejnë në pikat e shitjes përkatëse. Institucioni thekson se prania e kësaj lënde toksike përbën një rrezik serioz për shëndetin e njeriut.